Charta qua Willelmus de Centarben miles notum facit se mansum in eadem villa Centarben monachis Cluniacensibus dedisse.
Notum sit omnibus tam presentibus quam posteris, quod quidam miles, nomine Willelmus de Centarben, dedit quemdam mansum in supradicta villa, fratribus Cluniacensis monasterii, in honore sanctorum apostolorum Petri et Pauli consecrati, et servum in eodem manso manentem, Ermenaldum nomine, et cuncta ad ipsum mansum pertinentia, absque aliquo retinaculo, pro sepultura filii sui Girardi, qui in cymiterio prefati monasterii humatus est; tali tenore, ut fratres ibidem Deo servientes in perpetuum, sine omni inquietudine habeant et possideant. S. Hugonis, filii sui. S. Heldini, fratris sui. S. Girbaldi Viridis. Si quis autem hanc donationem improbo ausu temerare presumpserit, omnipotentis Dei iram super se provocabit et sanctorum apostolorum indignationem et debitam ultionem, nisi cumdigna satisfactione evitabit; insuper cum Datan et Abyron quos vivos terra glutivit, et cum Juda traditore Domini, maledictionis spiculo perforatus, eternorum suppliciorum mortem nullatenus, utpote sacrilegii reus, effugere poterit.
(Au dos:) Carta Girardi militis, de uno manso in villa de Sentarben.